СЮЮНЮП ОЬЛМЕ ТАРЫКЪ

Автор: Магьаммат АТАБАЕВ

Бир йылтыны пагьмуну
чыкъса да бизин сёзден
халкъ яхшы,
халкъ рагьмулу
кёп затны гече бизден.

Къайдагъы бир шарайып
йырлар язып чыкъса да,
шагьдай болуп орайып,
сагьнадан къычырса да,
кёп сюемен деп халкъны
бош даллайлар сокъса да,
кёп сююп, оьз халкъыны
кисесине сукъса да.

Къыйын болгъанда халкъгъа
къачып ари тайса да,
халкъ мени англамай деп,
сонг айыбын чайса да,
халкъ яхшы — шаирмен деп,
чыкъсанг да, оьзюнг айтып,
аяларын аямай
харс ура къайтып къайтып.

Биревню уьюн йыгъып,
уьйде рагьат ятсанг да,
халкъынгны шайлы-шайлы
уланларын сатсанг да,
бир йылтыны пагьмуну
чыкъса да — гёз къамаша,
халкъ яхшы,
халкъ рагьмулу,
сыйлай сени тамаша.

Ишин-къуллугъун къоюп,
тепсилер къура къала,
тартып бир мал да союп,
сени ёлгъа да сала.

Айырып да айланмай
яхшы булан яманын,
бизин бош даллайлагъа
харжын бере, заманын…

Бар-ёгъун бере сагъа
чомарт экенге эпсиз,
тек къазан ачыкъ буса,
айт, не тарыкъ, эдепсиз?

Эдепсизни дюньясы…
Гьали заманлар шолай,
адамлыгъынг оьлген сонг,
оьлюп къалсанг да къолай.

…Алдын буса
Ушатмай
Гелтирген хабарланы,
Ташгъа тута болгъан халкъ
Гьатта пайхамарланы.

Бизге шону унутмай
Турсакъ — бетибиз ярыкъ.
Къойса да, ташгъа тутмай
Сююнюп оьлме тарыкъ.